SAPULENKA

Limmangeb ti  arapaapko a makadennaka
Nayadayoka ket kasla gurruod a nangegak
Ti panagpukawmo a nanggubuay
Iti tudo ditoy batogko.

Ngem diak paikuyog iti liday,
Masirsirayak ti bullalayaw
Ket ti angin,  yar-arasaasna
A mabirokankanto met laeng
Uray ulawennak ti alipugpog.

Kompas kaniak 'ta pateg,
Itudona ti ayanmo
Ta siak ti tulbek ti lubong a nakaipupokam,
Idiay nga iruarka, sakruyenka
A sidudungngo.

SUERTE CRISTOBAL PULPULAAN

Kuwait City

ITI UNEG TI LUGAN

No iturturongko ti manibela
Ket mangegko dagiti agtutubo a kanta
Kasla mataltaldiapanka latta iti kanawanko
A nakatugaw-
Ikumkumpasmo ti timidmo,
Ti abagam
Ken dagiti bibigmo
Iti ritmo dagita a nasam-it nga aweng
Bayat a dagiti ramayko
Ket makisalsalada kadagiti ramaymo.

Ket diak madlaw ti kinabetteg ti trapik iti Fort Weaver Road,
Ti panagsukatsukat ti maris dagiti silaw ti stop light
Kadagiti nagkurosan,
Maapresiarko ketdi ti kinaadu dagiti agukrad
A petalo ti plumeria iti igid ti dalan
A pagin-innagawan a pagbatayan
Ti kaririing a lawag ti init
Ken dagiti napuyatan nga angep.
Ket iti yanta,
Iti nakarikep a lugan, bukodak a lang-aben
Ti nalamiis, sumam-it a banglo ti sabong
A sumgaw kadagiti abut 'ta kudil
Ket saanto a maparisan ti naayamuom a pul-oy
Nga agkarapkarap iti ruar.


CORAZON F. QUIAMAS
Ewa Beach, Hawaii

BAYAKABAK

Diram-osam 'toy rupak a naslep
Kadagitoy luak, digosennak,
Anudem amin  a saem
Manipud kadagiti naranggas a lasag,
Waknitam ti aglawlawko kadagiti mangtubeng
Iti naannayas a panaggarawko.

Madudogak ta isuda a mangaywan kaniak
Ket dangrandak, in-inutenda pay  a sabidongan
Dagiti napapateg kaniak.
Awananakon  iti wayawaya,
Imbaluddak iti bukodko a pagtaengan
Diak maagepan ti kadaratan a nakairuamak.

Kasapulanka,
Bugguam amin dagitoy  nga anek-ek
Ket mabang-aranak.


LOWELA AVANZADO  ZAMORA LAUD
Ma On Shan, Hongkong

SURNAD

patgek a bebeng-
diak kayat a mapamurdongam
'toy suratko
(wenno maibagak kadi a daniw?)
babaen iti “ hello?” “kasanoka metten?”, “ania ti obram?”
wenno iti simbolo ti isem a napaabayan iti puso.
ngem addaak ita gapu ta nabayagen

daydi naudi a panagdennata
ket ita, inwalinnak nga awanan gaway
'toy iliwko tapno madanonna dagita matam.

dinak koma kagura ngem
pinilik idi ti nagulimek iti naunday bassit
a panawen gapu ta diak kayat
a siak ti tubeng ti naraniag a masakbayam.
ken maysa, ammok nga awanto
met laeng ti banag
daydi naisalsalumina a langenlangenta
ta marikriknak idi
ti kasla in-inut nga itatamnay
ti riknam gapu iti amak
a pagtengen ti kasaadta.
ngem no malagipmo
daydi kinunak kenka nga uray
agngudonto dagiti bulodta a kanito
a kanayon nga abbongan dagiti kortina
ti tawa wenno salakniban
ti nakarikep a ridaw,
addanto eternidad a ngayed nga ibatida
iti tangatang ta sinno ti mangipagarup
a sika ken siak ket naginnayat iti nalimed?

agpayso nga amin a napasamak ket
naaramid iti rabaw ti imbaddekta a konsensia
wenno iti likudan dagiti mata
dagiti adda iti aglawlawta
ngem makunam kadi a basolko
wenno basolmo ti saanta met nga impagarup
a panagrusing ti nasam-it
a bukel ni ayat iti lukong
dagiti nakinnamayet a dakulap?

umayak ita kenka ngem saan a tapno
kayatko nga awisenka manen
nga agay-ayam iti nalimed a suli
ti panawen a pinanawanta.
immayak ket kayatko laeng nga ibaga
nga agingga ita, addaka latta iti barukongko
ket sisasaganaak a mangsurot, agur-uray
iti ania man nga ibalikas
'ta namsekan a kinaulimekmo.
ket no kayatmo nga agpukawakon,
wen, innakon ket ita met la a kanito
kaguyogko ti layap a tilmonen
ti nasipnget a law-ang
ket idiay, maimantonto
iti agnanayon dagiti lagip.

CORAZON F. QUIAMAS
Ewa Beach, Hawaii

SALUDSODEM SIGURO

salsaludsodem siguro ita bagim
no ania ti maal-alam no ayatennak
ta adda ngaruden mangay-ayat kaniak
addan pamilia a rienriendaak
apay koma ketdin nga isugalmo
ti masakbayam iti kas kaniak?
dika mababalaw no dinak maayat
no kaguranak, no kasuronnak
ngem daytoy laeng ti maibagak
ay-ayatenka-- iti puso, iti rikna
agpayso nga addan ay-ayatek
nga addan mangay-ayat kaniak
ngem apay, wen, apay?
apay nga agayatak pay laeng kenka?
apay a sika ita ti linaon dagiti darepdepko?
apay nga itan ket kaduaka iti arapaapko?
basol la ketdi ti tiempo... nakasasaur!
awanka idi sapsapulenka
nabayag, nakabaybayag a binirbirokka
ngem awanka...awanka idi
ngem ita,  addakan, kasano pay ita?
kasano pay a sika ken siak koma?
pangngaasim ta ibagam
ibagam ti aramidek, o dayag
ta kayatko ti matayto dita arpad.


FERNANDO ALONZO
Wahiawa, Hawaii

BAY-ANNAK

Pampanunotenka ditoy kadaratan:

Ammok a basol ti agayat kenka
Awananka iti wayawaya, ngem mapabasolnak kadi no  sika?

Awan kadin karbengak
a maaddaan iti naragsak a gundaway ken darikmat
iti sidongmo?

Iti naunday a pannakailibay
nagtungbol ti  gartem
a mangtagikua 'ta nasingsinganen a ramay.

Pakaumsiak man , diakto ikankanno
yikkiska a kanayon ditoy naulimek a lubongko.

Bilang biddut daytoy
bay-annak nga agtunglab ken
malmes iti taawmo.


IMELDA BATARA ALIBUYOG
Koblenz, Germany

ILIW

Mangmangegmo kadi
dagitoy sainnekko iti rabii
a maturogta?

Mariknam kadi
a kayatka nga arakupen
iti agpatnag
tapno ipariknak 'toy ayat?

Ngem uray kadendennaka
adayoka  ta dayta imatangmo
awan kaniak.

Kasano  nga ipalawagko
ti an-anek-ekek iti sikigam,
a kailiwko daydi kanito a damota
ti agdenna?


JOSIE HERREMA VITALES
Burgos, Ilocos sur

IMPAGARUPKO A SIKAN

Impagarupko a sikan
Ti sungbat dagiti arapaapko;
Ti mangpidut kadagiti maregmeg ti kinatiweng;
Ti mangilili kaniak kadagiti naatap a rabii
Nga alimbasagenak
Ngem saan ta nagriroak-
Diak nadnadlaw ti naglinged nga isem kadagiti pormal a bibigmo
Diak naripripar ti maem-em-eman a katawa ti unegmo
A kasla agpaypayso amin dagiti tignay ken langenlangen
Intayabnak iti kaulepan
Nagbalin ti bulan a silawta
A nangap-apras kadagiti bituen
Palso, wen, palso amin nga impakpakitam ken imparpariknam
Ta kalpasan ti karita iti altar
Imbatinakami nga agina a kasla awan serbina iti langalang.


VIRGIE FRANCIA
Salcedo, Ilocos Sur

PANAGURAY

Agdudukot ti init-
gapu kadi ta agpakadan,
sumuksok idiay igid ti bantay
ket alun-onen manen ti rabii.

Ammom kadi a kastaak met-
nasipnget  'toy paggargarawak
a paraangan ta diak masapulan
dagiti bituen?

Agsidduker 'toy riknak
ta awandan a mangyanninaw
'ta rupam.

Kaanonto ngata, ayatko
a sumilnag ti rabii
ket matakuatam
a naranraniag ti aglawlawko
no makitaka  iti abayko?


JOSIE HERREMA VITALES
Burgos, Ilocos sur

MANGLIMLIMO ( Sika wenno Siak? )

    Umapros latta ti liday
    Tunggal isawangmo nga agpampamarangak
    Umandingay  ti sasainnek
    Tunggal ibalikasmo a siak 'tay nanglipat
    Dumges ti ladingit
    Tunggal pasagidannak
    Ngem umarakup  latta ti iliw
    Tunggal mangegak 'ta katawam
    Uray  kas panangumsim kaniak.

    Apay, aniat' nagkurangak-
    Bassit la a biddutko
    Ngem isu la ti  makitkitamon
    A panggurguraam kaniak?
    Awanen  kadi ti serbina dagiti agkakasam-it
    A langenlangenta
    Wenno inarakupen dayta pusom
    Dagiti pammadakes ti kaaduan
    Ket nabalkoten dayta ayatmo
    Iti nasipnget nga asuk ti gura?

    Kunak no siak ket  impategmo ngem
    Sinno itan ti nakaabungot, nalaing a mangallukoy
    Ken ti di pulos mapagtalkan?
    Siak kadi a pagsayaatan laeng ti pampanunoten,
    Ipangpangruna ken  yal-alikakana?
 
    Apay a bassit la a palito ket sigudmo metten a ginangtan
    Ket nangparnuayka iti dakkel nga uram?
    Imbes a siak 'tay iliklikmo
    Saan met ta siak pay ti immuna nga insebbam
    Biddutmo ta apay a kayatnak a dagus a mauram
    Sinno pay itan ti pagtalkam
    Ammok itan  a dinak  pulos impateg
    Saan a pudno a siak ket  impangpangrunam
    Ta apay a naiturednak nga imbelleng ket napukawak?

    Bungonem man  'toy pusok iti agniebniebe a gura
    Isebbanak man iti asupre iti mamin-ano a daras
    Diak  puloston iginggina
    Ta diak  mapukaw wenno mauram
    Ta sakbay nga induronnak iti pakatayak
    Naaramidmon  kaniak ti pudno a galadmo
    Sayang,  sika 'tay tao a nagtamtammedak
    Ngem ayanmo itan?
    Sika a taklin, sarukod, abagak ken  nagserbi a paniok
    Dinak man laeng inilala  no pudno a napategak kenka.

    Ayanmo itan?

    Siguro,  madamakan a mangsabsabon iti imam
    Yanudmon natda a pakalaglagipam kaniak
    Ngem daytoy ti tandaanam-
    Ti panangurammo kaniak
    Pinarnuayna ti nasaem nga asuk
    Ket dayta ti dimo inanag nga immuna.
    Wen, mailemmengmo ti pudno nga inaramidmo
    Ngem dumtengto ti kanito
    A lumtuad ti kinapudno- dagiti nakaimatang
    Iti nalangeb nga asuk ti  liday
    Iti tangatang a nakaipuruakak-
    Tangatang a 'yan dagiti bituen a tangtangadek
    Ammok,  addada a mangandingay kaniak
    Saanak man a maibilang kadakuada
    Ngem addaanda't bimmanatiran a kalintegan
    Awan man imetda a balitok wenno diamante
    Agkikinnibinda met iti las-ud ti nasipnget nga aglawlaw
    Aniat' serbi dagiti gamengmo ita nga ik-ikutam?
    Awanen, isudan 'tay nakaimatang iti ugingen a langam
    Dimo pinampanunot  a sakbay nga insebbanak iti apuy
    Ket siaarakupak kenka.

    
   MARICHEL E.  SUGUITAN

   Sai Kung N.T.

   Hongkong

    

NANANG

Sikat'  nangted maris
Bullalayaw a lubongko
Sikat' nangbisbisong kaniak
Bayat pannaturogko
Sika ti anghel iti biagko
Impasagepsepmo kaniak ti ayat ti Dios.

No mayaw-awanak
Sika ti nangiturturong kaniak
Iti nalinteg a dalan
Pamagbagam isut' nangmuli kaniak
Tapno maipagpasindayagnak iti kaaduan
Ayat ken pammategmo awan makaartap.

Agyamanak iti kinaanusmo
Ken nabara nga arakup
Diak marikna ti buteng ken liday
No sika ti adda ditoy sibay
Sikat' kapapatgan a sagut ti Dios
Saanka laeng nga ina no di ket pagayam
A nasinged ditoy pusok.

Ngem itan ta awanka metten ditoy arpad
Anian a saem ken liday diak masbaalan
Sapsapulenka iti inaldaw-aldaw
Ngem uray sadino man ti ayanmo
Addaka latta a naitalimeng ditoy puso
Dikanto pulos malipatan
Ay-ayatenka, nanangko
Agyamanak ta gapu kenka
Naragpatko dagiti arapaapko.


ANGELITA PASCUA SALAMERO
Claveria, Cagayan.

Diretso Manipud Iti Puso: Antolohia Dagiti Daniw ni Ayat

Maisagsaganan ti Diretso Manipud iti Puso: Antolohia Dagiti Daniw ni Ayat Dagiti Ilokano. Ipablaak daytoy ti Diretso Manipud iti Puso Facebook Group ken Saniata Publications.

Agpaay nga editor da Ariel S. Tabag, Corazon F. Quiamas ken Roy V. Aragon.

Pagalagadan iti Panagidatag:

1. Uray mano ti daniw nga idatag (di pay naipablaak wenno naipablaaken iti magasin, wenno dadduma pay a babasaen, wenno naipaskilen iti Internet). No naipablaak wenno naipaskilen, masapul nga adda notasion iti baba ti sinurat mainaig iti detalye ti pannakaipablaak daytoy. No naipaskilen iti blog ti Diretso Manipud iti Puso, ti autor ti mangadaw iti daytoy ket idatagna met laeng kadagiti editor. Segun ketdi iti pangngeddeng dagiti editor dagiti mairaman a daniw. Karbengan dagiti editor ti di mangipablaak kadagiti maidatag a daniw a di makapatar iti pagrukodanda.

2. Daniw ni ayat ti idatag. No daniw ni ayat, kunatayo, isu daytay romantiko, ken/wenno karnal wenno seksual a panagayat. Ngem saan a basta daniw ti agar-arem, napukawan iti ayat wenno agpaspasidumri nga agay-ayat. Ketdi, iparangarangna dagiti aspekto ti panagayat ken kabibiag ni Ilokano. Ipakita koma dagiti daniw ni ayat ti sangkapirgis a paset ti kabibiag, kananakem ken kararua ni Ilokano.

3. Mapakuyogan dagiti sinurat iti pakasaritaan ti biag ti autor (saan nga at-atiddog ngem maysa wenno dua a parapo), karaman dagiti contact information (adres, numero ti telepono/selpon, e-mail), ken kaudian a ladawan ti autor.

4. Ipatulod babaen ti e-mail dagiti sinurat iti asseng.tabag@gmail.com, cquiamas@hawaii.rr.com, wenno rvaragon@gmail.com.

5. Masapul a maawat dagiti daniw iti di naladladaw ngem Nobiembre 31, 2012.

6. Agdalan dagiti daniw iti naiget a panagarisit dagiti editor. Mapakaammuan dagiti autor a mairaman iti antolohia dua lawas kalpasan ti naituding a deadline.

7. Maipablaak ti libro iti wagas a tagnawa, wenno panidna, bayadanna. Masuktanto ketdi iti libro a ti bilangna, depende iti kaibatogan ti naitagnawa a gatad.

8. Manamnama a mayalnag ti libro iti Pebrero 2013, ti bulan ni Ayat.

9. Para iti dadduma pay a detalye, makiuman kadagiti editor iti e-mail iti ngato.

Nabulod ti imahe iti sew-over-it.blogspot.com

------------

@nakopia daytoy a pakaammo manipud iti DANIW KEN SAMIWENG a blog 

ITI TANGATANG

nangisit dagiti ulep
a nangbungon iti tangatang
agparangto pay ngata dagiti bituen?
sapsapulendaka dagitoy matak
iti likudan dagita a nalidem a kapas
ngem awanka dita a makitak.

iti narabuy a karuotan
a nagid-iddaanta
barukongmo ti nagsadagak
a nangpakalma 'toy riknak
ket nagawis ti pul-oy, 
nagdanggayanta a pinabara
ti inyaprosna a salemsem .

dayta ti ayat a nangted maris ti aglawlaw-
winadaanna ti langit  babaen iti napaut
nga agek ken nairut nga arakupmo.


IMELDA BATARA ALIBUYOG
Koblenz, Germany

BALITOK

Maysa a rabii nga isasangpetko
Manipud iti panggedak, nariknak bannog ti bagi.
Maparikutanak pay kadagiti teks dagiti annakko
Kalikagumanda ti pagbayad idiay pagadalan
Ken dadduma a kasapulanda.

Bayat ti pannagnak iti kasipngetan
Adda nasirayak a lawag iti di unay adayo
Sinursurotko ta umad-adayo
Napartak ti panagtulidna isu a kinamatko.

Idi nagsardeng, adda bassit a ruangan a naglukat
Makasisirap ti lawagna ket insarapak ti imak.

Nangegko ti maysa a timek a nagkuna,
"Sumrekka, madaydayaw a prinsesa."
Saanak a nagkir-in ta saanak met a prinsesa
Ngem adda napigsa nga angin
A nangiduron kaniak tapno sumrekak.

Nakaunegak a kasta unay siddaawko-
Balitok amin a diding dayta a pasdek
Amin a tugaw ken alikamen
Agkakapateg a batbato ti nakitak
Narimat a buya ti naimatangak.

Adda manen timek a nangegko-
"Amin a maawitmo,  yawidmo."
Nagtukiadak ta amangan no susuotennak laeng
Ngem immasideg kaniak dagiti balitok a nagpasab-ok.

"Kukuam amin dagita,  isagutko kenka
Ta makitak ti sakripisiom. " Ngem diak innala dagiti balitok.
Agsaoak pay koma ngem kellaat a nagangin ti napigsa
Nagkidemak ta naapres dagiti matak.

Idin ta nagsardeng ti angin immulagatko
Addaak metten iti ruar a nakatakder
Ket kargakon dagitay balitok a nagpasab-ok!

Inyaskawko dagiti sakak
Tapno agsubliak koma ta isublik
Dita metten a nakariingak
Gayam ket naimayengak ket nagdarepdepak.


IMELDA EMY TOLEDO

Calgary, Alberta

SIKAT' GAMENGKO

Kanayonka a makita a naliday
Nakatangad iti nasipnget a tangatang
Adayo unay dagiti matam
Kasla adda sapsapulenda
Kasla adda kayatda a gaw-aten.
Addaak ditoy sibaymo
Ngem piman dimo payen marikna
Dagiti nairut nga arakupko.

Diak masinunuo no aniat' adda dita panunotmo
Ta dayta imatangmo ket nakaad-adayo.
Sapsapulem kadi dagiti bituen?
Wenno maysa laeng a bituen?

Dimo kadi madlaw nga awan agraman 'diay bulan?
Amirisem koma,  adda isuna ditoy daga-
Dinan kayat ti agpasag dita law-ang
Agsipud ta sinurotna, ing-ingutenna unay a bituen.

Wen, sika dayta a bulan
Ket madlawko a nagbaliwkan.
Ing-ingungutem a bituen nga adda laeng ditoy arpadmo ita
Malmaldayen ken awananen rimat dagiti matana
A mangmatmatmat kenka a maikulkuleng
Ta uray pay kinunam nga ay-ayatem
Ngem apay a dimon pulos iginggina?

Madlawko, kasla nagpukawen a bullalayaw
Dagita isem- awananen maris ken ragsak
Ayatmo ket naibaw-ingen iti sabali a raniag-
Saan a bituen no di ket daytay gumilgil-ayab a layap.

Daytoy laeng ti makunak-
Wen, naranraniag nga amang dayta a layap
Ngem apagapaman laeng ti lawag ken ragsak nga ipaayna.
Maysaak man a nanumo a bituen,
Laglagipem a dagiti rimatko dinto pulos agkupas.

Dumteng man ti nakarit nga allawig,
Lengdandak man dagiti nagpanes nga ulep,
Ipaidammo man dayta kannagmo,
Ikarigatakto lattat' agrimat
Uray nakudrepen ken awananen namnama pay
Nga agpasag dita sidongmo
Tapno laeng maiparangarangko
... a sikat' aminko
... a sikat' raniagko
... a sikat' kiredko
Agsipud ta agmaymaysaka laeng
A gameng ditoy pusok.

Diakto pulos gamden ti agnaed dita tangatang
Agsipud ta ti pudno a ragsak ket ditoy daga laeng a masarakan.
Ken ti pudpudno nga ayat- saan a nangato
No di ket ditoy laeng daga, napakumbaba.


MARICHEL E. SUGUITAN
Hong Kong

SILALAGIPAK

Agsasaibbek dagiti gundaway
a kaadayok iti dennam,
nagpanes ti rabii
tunggal tangadek diay bulan,
agkukudrep dagiti bituen
a mangbuybuya iti naliday a rupak,
masmasnaayan ti angin
a mangpumpunas kadagiti luak
nga umarabos ditoy eppesen a pingping
tunggal saibbekko ket ar-arakupen
dagiti uni ti kuriat.

Wen, biagko, manipud immadayoak
dita sidongmo, amin a kanito,
ken amin nga adda ditoy aglawlawko
ket dangdanggayandak iti lidayko.

Dagiti iliw a diak mailemmeng
nga ipagarupmo nga awanen kaimudingam
ditoy pusok-
biddut amin dagita,
agsipud ta sika laeng
ti mangmangted kired
ken pigsak nga agbibiag,
gaput' kinaadayok dita dennam.


Dinak koma kagura,
mamatika- ay-ayatenka,
naunday man a panawen
ti inta panaginnadayo
ken panagsagaba,
amin dagita ket masupapakanto
iti agnanayon a ragsak.


MARICHEL E. SUGUITAN
Hong Kong

ANNINIWAN

maysaka kadi a sarming
ta apay a kada sanguenka
ket agparang ti ladawan
'di kalman a nagpappapasanta?

uray no punasek tapno agbaliw,
umalis ti ladawan nga ipabpabuyam
ket ad-addaem nga awisen 'toy imatang.

apay ngata a sika latta ti  buya
ti napalabas a mangkulkulding
ditoy riknak tapno lagipenka?

nalagda unay ti sarming nga inka imbitin
ditoy muging ta uray iti kaanoman
dika pulos maiwaksi!


 
JOSIE VITALES
Burgos, Ilocos Sur

PANAGRUSING

Awan kaaspingna nga ayat  ti impariknam kaniak
Ngem iti apagapaman ket kineltay ti sulisog a namimpinsan.

Gandatekon nga ikupin ngem ad-adda met
Nga ukraden ti lagip kaniak-
Napudno a panagayat ti ninamnamak
Ngem gayam narasi, narukop, napalangguad.

Agyamanak laengen iti Dios ta idi irubuatko nga ipulang
'Toy biag, dinak binaybay-an  ta adda dua a bunga
A mangnamnama kaniak, nakitak dagiti isemda
"Agyamankami, Mama, ta naisalanka," inyesngaw dagiti bibigda.

Ket naungap dagiti matak iti kinapudno
Inggaedko ti nagtrabaho uray kaipapananna
Nga umadayoak tapno adda naraniag a masakbayan a maitedko.

Ita, uray adu ti  agkalikagum kadaytoy ayat
Naadalanakon, diakon kayat ti masugat
Sintirek nga umuna, no napudno  kaniak
Ta addanto latta manen irurusing ti ayat.


NORALINE  DOMINGO
Hong Kong

ARAPAAP

Inturongnak iti dalan a mabalin a mangitunda kaniak iti balligi-
Agpaypayapay dagiti bituen, aw-awisendak
A makipatang ken makidanggay kadakuada.

Diak makapagkedked agsipud ta iduronnak met 'toy riknak
Kadagiti balikas a mangmangegak-
Isuda ti mangbungon kadagiti sakak iti desdes a pagnaak
Isuda ti mangguyod iti imak ken mangisuro kadagiti ramayko
A mangkurengreng kadagiti kuerdas ti gitara ni daniw.

Dagiti bituen silnaganda ti masanguanak
Nawatiwat man ngem diak marikna ti bannog-
Nainayad ti aksawko
Nalag-an met ti panagdisso dagiti baddekko
Diak mailadawan ti marikriknak a ragsak ta iti baet
Ti adu a pagkurangak, adda latta naibugas a pateg ken ayat
Iti sarita nga inda yebkas.

O Baggak iti murdong daytoy a dalan nga insurom a pagnaek
Dagiti ayat, kinaimbag, anus ken balikas a makatukay rikna
Ket tagibienda ti kinaagmaymaysak.
No dumtengton ti aldaw a maimatangak dagita naisem a matam,
Masinunuokton nga agpangpangatoak iti agdan ti balligi
A kas agsursuro a mannaniw.

 
JESSIE MIER PACIO
Gregorio Del Pilar, Ilocos Sur

KAS MAYSA A TUMATAYAB

Ap-apalak dagiti agkakapintas
A daniw ken balikas a mabasbasa ken mangmangegak-
Anian a makaay-ayo ti pannakayablatda

Maysaak a tumatayab ket arapaapko a madanon ti nalawa a law-ang
Adu dagiti tangtangadek a tumatayab, nagragsakda,  nagsarangsang
Dagiti paggaakda a mangmangegak

Padpadasek a yunnat dagitoy payak iti agsumbangir a takiag ngem ammok
A saanak pay a mabalin nga agampayag ta nakurang dagiti dutdot
A nangbalkot kaniak

Il-iliwek nga iti maysa nga aldaw ket agampayag met a sumarungkar
Dagiti sabong iti aglawlaw ket kablaawaak  ken sagutak ida
Kadagiti agkakasam-it a samiweng ken balikas

Urayek ti naikeddeng a panawen a pannakatungpal iti arapaap a nabayagen
A segseggaak-
Ti agampayag a naimballigian a kaduak dagiti sabali pay a tumatayab.




JESSIE MIER PACIO
Gregorio Del Pilar, Ilocos Sur

SULISOG

Diak man impagarup a ti bileg ni sulisog
Ti mangrakrak sinangalta nga ayan-ayat
Narpuog iti apagdarikmat
Ta nagpailayuska iti aluyo ti nainlubongan a ragsak

Simiasika iti tinalaytay a dana
Dimo man la pinanunot ti pagmaayanna
Nagbalinka a bulsek iti kinapudno
Inarakupmo ti biag a nangipaay kaniak iti awan kaaspingna a limdo

Ngem uray no kasta
........nagibturak
........naganusak
........nangnamnamaak
A mapasublita met laeng
Bara ni ayan-ayat

Inibturak dagiti pammasakitmo
No man pay adda dagiti gundaway
A kasla bumtak ti barukongko
Gaput' kinadangkok nga impalak-ammo

Ket iti panagtulid ti panawen
Namnamaek nga agbaliwka, narsaaken
Panaglangoymo iti gayunggayong ti basol
Iti kinataom naigameren

Pinagarim ti bileg ni sulisog iti bagim
Pannakarakrak pagtaengan a binangonta saanen a maallangon
Ta daydi sudi ni pammateg
Nagbanagen a gura a gumaygayebgeb

Ti laengen panawen ti makaibaga
No kaano a mapakawanka
Ket sapay  koma ta makaruk-atak metten
Kadagiti lagip ti impalak-ammo a sakit ken saem.



LOWELA AVANZADO  ZAMORA LAUD
Ma On Shan, Hongkong

GAPU KENKA

Gapu kenka
naaddaanak iti kired
a lumaban a sipipinget
ta sikat' kalasagko a mangparmek
iti amin nga an-anek-ek.

Umayka,
agpinnetpetta
iti naangin ken natutudo
a dalan
ta patiek a sumiripto
ti init iti uneg ti nakuso
a kabakiran.


JONA SUNGGAY DAYAGAN
Singapore, Singapore

KAARIGNA

Kaarigna ti kanta daydi ayan-ayat-
Nakasamsam-it, umap-apuy
Daydi lubongta ket napnuan iti sirmata, linasatta
Ti dana a kasla awan patinggana.


Kaarigna ti littugaw daydi sika ken siak
Ta inakupna pati  aglawlaw.
Segseggaak dagiti karita
Ngem naitanemda  iti kadaratan
Iti ballasiw ti taaw a napanam.

Kaarigta ti samiweng 
Ngem ti ungtona ket naladingit
Damagek man: malagipnak pay ngata?




FERDINAND N. CORTEZ
Tuguegarao City, Cagayan

PANAGREREGREG

Talaga la ketdi a di malapdan
Ti yaadani ti panaglalamiis 
Sumagmamano la a lawasen
Nabengbeng manen ti mayaruat.

Mangrugin nga agregreg
Dagiti bulong a pannakabuok
Dagiti kayo a taeng dagiti tumatayab
Nga ita,  mangrugin a makalbo.

Panagreregregen
Ay,  anian a nagaliston  ti panagtulid iti panawen
Kasla marikriknak ti tumulang,
Umukuok a lamiis.

Balkotek la koma ti  beggang iti pagnaak
Tapno diak  agtigerger
A sumungad iti lugar a nakaipalaisak.

Ngem  isut' gasat
Ti makitagabo iti niebe,  
Isut' pagbiagan dagiti annak
Nga agur-uray iti maipuruak.

Ala,  kasta la ti biag
Adda nagasat, adda met namalas a padak.

IMELDA EMY TOLEDO

Calgary, Alberta

TI IPUPUSAYKO A KAS KULIBANGBANG

Agnaedakto iti tangatang, iti sirok dagiti nakusnaw nga ulep.
Pasetnakto ti angin a mangpuypuyot kadagiti bulong
Tapno salaenda ti sala ti indayon.
Ngem maysaakto nga ullaw a naisina iti linasna,
Gapu't tadem ti punyal a nangruros iti urat a mangted iti dara
Tapno ti  arapaap a maris ken pannakabalin ket matungpal.

Saanak a nagbalin a kulibangbang no awanka a gapuna
Ti nasin- aw a marismo ket kas anghel
Iti nangayed nga altar.
Ti agrukbab kenka ket naindaklan a gundaway,
Sika ti amin, pakabuklan, kinamaingel
Ken balligi iti dangadang.

Ngem ti puraw a rosas addaan met karirikna ken panunot
Agayat ket adda kenkuana,
Patgenna ti kiddaw no la ket kabaelanna.

Naatap met gayam ti gasat ken ni rosas.
Pagtamedanna unay nga alimbubuyog
ket paset met ti nakaparsuan.
Arapaapna met la ti gapu no apay a dina inkankano
Dayta a sabong ta ngamin ti nalabbaga nga ayan
Dagiti diro ket manmano iti minuyongan.

Daytoy ti gapuanan ti naipagteng a gasatko, saanak
A maingel ngem pudno 'toy ayatko.
Kenka rosas, no masapulmo, itedko 'toy darak
A pangdayas kadagiti rusingmo uray
Kaipapananna iti pannakaungpot 'toy biagko.

Agragsakkanto iti denna ni alimbubuyog
Ket ti sangalenyo nga ayat siakto ti saksi
Gapu ta pasetnakton ti tangatang-
Maysaakton a bangkay.


ALFRED M. GABRIEL
San Agustin, Isabela

PANAGTAO

Panagtaok ket nagtengan
Innak agyaman kenka, o Naindaklan.

Dawatek ti ad-adu pay a parabor
Adu nga ayat ken bendision
Tarabayennak, ilisinak iti ania man a peggad.
Patibkerennak tapno adda pigsak a sumaranget iti ania man
A pannubok ditoy a biag, ikkannak kadi
Iti ad-adu pay nga aldaw nga agbiag
Ken napintas a salun-at.

Agyamanak kadagiti nagannak kaniak
Nga isuda ti nakautangan iti biag
Kasta met kadagiti kabsat ken gayyem,
A makairuknoy ragsak ken maris
'Toy lubong a paggargarawak.

Kadagupan amin a pannubok, pannakapaay
Panagballigi, ragsak ken dawel panagbiag,
Isuda ti  sarming ken mangpatibker kaniak
Gapu kadagitoy, Apo, agyamanak.

Kangrunaan ti amin-
Ti panagyamanko Kenka
Ken iti pamiliak nga isuda ti kangrunaan
A gameng 'toy a biag.


RISSEN TACLA  ASCANO
Vancouver, British Columbia

PANNAKALIPAT

i.
Atagennak a kas maladaga ket abbongannak
a kaduak ti narangrang a tangatang,
riingennak a kaduak ti agmatuon nga angin
iti karasakas ti nagbaetan dagiti aruo

Kayatko ti mailibay iti nauneg a pannaturog
tapno tagaimpek dagiti tagtagaimpem;
kayatko nga agtulid ti lubong kadagiti dakulapko
kas iti bassit-usit a nangisit a balurio.

ii.
Nalaus ti panangparigatmo kaniak,
no bukodta ti kanito a nawaya-
diak kayat ti maris,
diak kayat ti uni.
Dawatko, ipannak iti tuktok dagiti turod
iti nagbaetan ti ulep-panagrururos...
Apay a parigatennak unay?
Immayka kas maysa a bagyo,
ginunggongnak iti napalalo
a kas man addaak iti kayo
ket natnag ti panunotko iti daga
kas iti kappuros a mansanas
ken nupay agtuleng dagiti lapayagko
iti nalabes, iti kaunggan
sika ti bagim ay-ayamem ti leddaang.
Amin mawaras kas iti lupak ti unas
nagbanag amin a dapo, dapo...
Apay, aya, a parigatennak?

iii.
Impanawmo ti timekko kas iti uni ti kampana
ket agkatok ti awengna kadagiti nangato a kuarto
agingga iti lansad.
Iti nagbaetanta nga awan ti makabangen-
maysa a puso para iti dua.

Maysa, wen. No agsina ti kopa
saanko a maliklikan ti apuy
a mangapros iti naulimek a layus
ket malmesak kenkuana.

Wen, malmesak ken agsiddaawak
ta maysaak a bulsek a lames kadagiti koral-
yelo ti kaarig ti nagbaetanta
a timmangken ket ti apuy isu ti manguram.

iv.
Maysak a bulsek ket sapsapulenka,
yunnatko dagiti takiag
aprosak laeng ti iking ti ariwanas.
Asinonto ti mamagtipon manen kadata
nga agtugaw iti rabaw ti bato iti apagapaman
tapno imdenganta ti anasaas ti danum,
ti apros ti init,
no ti aglawlaw, linangeben ti sipnget?

Diak kayat, diak kayat ti agbalin a bulsek
kas iti rabii ti maysa a kalgaw a napudot;
kaano a masinasina dagiti langit
iti babaen ti dagsen dagiti butuen,
agtinnagda kaniak, iti abagak?

Sika, siksika laeng ti sapsapulek
ken dumngegak- iti sirok ti leppak ti kayo
iti narumrumek a tinapay,
agpitik ti di makita a puso...

v.
Ken riingennak kas maysa a maladaga,
guyodennak nga isubli iti narangrang a tangatang
winayawayaam dagiti kimmapas nga ulep
a binalud ken tinagikua dagiti sanga.

Awanton ti mairidep pay-
mangngeg ti aweng ti kampana kadagiti bantay
marunawak a kas niebe kadagiti kataltalonan
ket maysaak a pussuak a lumtuad
dita dakulapmo.


RUDY RAM RUMBAOA
Laoag City/Maui, Hawaii
[Naipablaak iti Agosto 8, 2011 nga isyu ti Bannawag]

PUNGAN A NAYAW-AWAN

Idi ubingak buybuyaek ni Inangko
Agpidpidut ken agur-urnong
Iti nagango a bunga ti kayo
Diak met ammo no an-anuenna isu a dinamagko
Ket kinunana,"kapas, anakko,  aramidek sukat daytay punganmo."


Apay ngata a masapul ti napintas a pungan
Ket isu la ti pagbambannogannan
Piduten, ukisan ken ibilagna
Mangdaitto manen iti paneksekan a kunana.


Bayat ti panagdakkelko, punganko inay-ayatko
Diak pulos kayat nga ipausar, uray iti siasinno
Uray no mapanak pay sabali a disso
Punganko latta ket itugtugotko.


Dimteng ti panawen, punganko impes metten
Masapulna ti sukatnan, ta naingpis unayen
Ngem saanko a pulos nga imbelleng
No diket kapasna ninayonak laeng.


Itan ta ni ayat ket napadasak
Mayarigkon ti maysa a pungan a napno iti kapas
No kaar-aramid wenno baro pay-
Kaykayatda nga ap-apungolen
Ngem no bumaybayag gayam
Ket kayatdakan nga ibarsak.


Nagrigat metten ti kasasaad ti maysa a pungan
No saandan a kayat ket sukatandaka lattan
Didaka man lang ammo a taripatuen wenno ilalaen
Ipayatpayatdaka nga ilugesluges
Sakbay nga ibellengdaka.


Bumirokdan iti sabali a pungan
'Tay namnamsek ken kabarbaro pay
Makadanonda payen ayan iti kaarruba
A mangsapul 'tay kaub-ubinganna,
Ken kalaslasbanganna a pagpungananda.


Kaasiak pay met piman
Ta daydiay punganko binuloddan
Ngem dida met ammo nga isublin
Punganko tinagikuadan.


Itan, siak ti naawanan,
Isu a masapulko met ti mangkitan
Pungan a kapkapnekak,
Daydiay pulos a dinto maum-uman
Kayatko a pungan ket 'tay agpaut ditoy dennak
Ken isut' kaabayko aginggana't sibibiagak.

MARICHEL SUGUITAN

Sai Kung N.T.

Hongkong

SILAW ITI AGLAWLAW

Kimmawiwit manen ti sipnget
Ket kas iti kadawyan nga ar-aramidek
Tumangadtangadak iti tangatang
Birbirokennaka ti imatang
Ngem awanka latta ket saibbekenen 'toy riknak.

Nagpauyo kadi metten
Uray ti bulan ta  awan ita a maimatangak
Sadino ti nagturonganna
Kailiwko manen a matmatan.

Pati kadi ti law-ang ket pinanawandan
Nangbirokdan iti sabali a disso a paggianan?
Rumbeng kadi a sapulek pay laeng
Ti impaayna a sellag idi kalman?

Nalabit a diak siguron tarigagayan dayta rimatmo
Ti kinangatom saanen a magaw-at ti panagkitak
Umanayen  dagiti nababa a silaw iti aglawlaw
A mangmangted lawag iti isu amin a disso.



ROSALIE ALBANO BARNACHEA
Burgos, Isabela

NAATA NGA AGSAPA

Agminar latta ti lagip a nangrugi
Iti naisangsangayan a paludip
Ken sinaruno ti nasam- it nga isem.

Sinamar pay laeng idi ti main-inaw a bigat
Tartaraudi ti rabii a nabignat-
Linaylayawta dagiti tambak dagiti kinelleng
Nagkibinta iti sirok ti bayakabak
Ket nangeganta ti samiweng dagiti kuriat
Iti likudan dagiti agririnnisiris a pagay.

Iti panaginanata, malagipko daydi
Mangga a nagkurabanta
Ken daydi asin iti rabaw dagiti dakulap
Indilakutta ti naunday
A rabii iti naata nga agsapa.

Ita, agmatuonen ngem
Suysuyaabaenak a maymaysa
Ta uray tinagikuak 'toy lagip
Tinagikuana metten 'ta pusom.
Ngem lumnekto latta ti init
Ket matalaytayto manen dagiti tambak
Iti agsapa a mangyula iti dua nga anniniwan-
Siak ken maysa a dayag a saan a sika.



FERDINAND N. CORTEZ
Tuguegarao City, Cagayan

ITI SIBAYMO

agaw-awis 'diay simmaba a bulan
kasla man nagtalinaay
a pagindayunan
kaduaka koma
ta inta agtugaw.

inta agbanniit kadagiti bituen
ket dagitoy pusota
agserbi nga alat
tapno dida makaruk-at
a kas saksi ti ayan-ayat.

no dumtengto ti kidem
agsadagakto kenka
ket no ti layap
lukagenna ti pannaturogta
tapno yawatna ti lawag
agwingiwingakto 
gapu ta sika ti layapko
ket kapkapnekanka .

SUERTE CRISTOBAL PULPULAAN

Kuwait City

BITUEN

Iti maysa a rabii a panagmaymaysak
Imbaludnak man ti sennaay
Pamrayak laengen a binuybuya
Dagiti bituen iti daya
Ngem bayat iti panangbinsabinsak
Kadagita a rimat
Nasilawam man ti imatangko
Gapu iti naidumduma  a talugading
Is-isemannak ti raniagmo
Kuldingenna 'toy pusok a balud ti saem
O  Bituen, ania ketdin a ngayedmo
Mabalin la koma a sika ket tagikuaen
Ngem daksanggasat ta inton bigat
Agawennaka ti lawag
Yadayonaka ditoy arpad
Ngem ur-urayekto ti isasaknap ti sipnget
Ket lumagto manen 'toy pusok
Iti panagkiremmo
Sika  ti parparmatak
Umanayen a ragsakko a makitaka
Uray dika matagikua ken maaprosan
Ngem ammuem koma
A ditoy pusok kas bukel nga intukitka....


ROWENA A. RUIZ
Hong Kong

PAGDANIWEK MAN MET TI DANIW

dagitoy daniw nga umayko isagsagut
naggapuda amin iti lansad 'toy pusok
nalagalaga a linabag mayaplag a kas ikamen
natalged a pagpasagan malmalday a gagayyem

saan a nasken a mangkaliak iti balikas
nga inus-usar ni apongko idi ubingak
ta diak kayat nga agadiwara angot ti lakasa
kabayatan iti umaymo panagilad nga aginana

saan a pinarbo dagiti nausar a tema
saan a pinilpilit dagiti rukod ken rima
saan nga agsapul pannakapadayawda
ta dagitoy ket iruknoyko iti amin a mangbasa

saanko a pengdan iti uray kaano man
no ti daniw ket rumsua manipud kaunggan
ta kasinginna daytoy pluma a masalsaluadan
naannad, naanus, saanna a gandat ti mangdangran

adda dagiti panawen a 'toy daniw, agsainnek
ta maimatanganna amin dagiti maidaddadanes
ket no bilang makayebkas iti umukuok a saem
ayat dayta a nasudi, saan a panagunget

ta daytoy daniw a kasingin ti kararuak
naasi la unay kadagiti marabrabak
no man pay adda panawen nga agkimat.


ALEXANDER SAMSON CRUZ
Manila, Philippines

GINA

Sipud pay naam-ammoka idiay
Kantina ni baket Maria,
Addakan ditoy panunotko
Ket iti dayta met la a lugar
Rikniknata iti tawa ti panagtennag
Ti linnaaw iti sabong.

O Gina, dinanggayannak-
Indalungdongmo kaniak
Liday ken ragsak.

Ngem gapu
Iti panangsamsam-itko kenka, 
Nagbalinka a mitsa ti dakdakkel
A problema ta siak metten ti naidalutaytay
Iti kama ket dandanin
Nauyos ti biagko  kenka.


O Gina, apay?
Narigat met gayam ti maigamer-
Makabibinegka ngem
Saan pay a naudi ti amin
Tapno patiek a saanka a talaga a bituen.




RIDEL TABIAN CABULISAN
Sanchez Mira, Cagayan

TAGIBI

Ap-aprosak ti gasat
nga inka nagbanagan gapu ta
pinanawannaka ti ayat.

Ngem punasekto dagita luam
iti nakalamlamuyot a panio
ket kantaanka iti nasam-it a samiweng...

Tagibienka
iti sursuro ken pammateg
Ket respetonto ti magun-odmo.

Iti panagdakkelmo,
dikanto pairubo iti  bisio-
saan nga agsingising
ti init kenka.


Isurok kenka ti sikreto a dalan
a panurnorem,
awanto pulos ti agbalin a tubeng
no adda kenka Isuna!



JESSIE MIER PACIO
Gregorio Del Pilar, Ilocos Sur

DAGITA RIMATMO, O BITUENKO

 


    Maysaak laeng a kulalanti
    Nga agan-andap iti rabii
    Ket iti tunggal itatangadko iti nalawa a  law-ang
    Kalkalikagumak ti maaranaaran iti rimatmo.

    Salsaludsodek iti bagik-
    Kaanonto ngata ti panawen
    Nga umasibayka kaniak
    Tapno nanamek ti imnas
    Ti agnaed iti sibaymo
    Ket dagita rimatmo ti mangkibin kaniak
    A mangdaliasat iti  kasipngetan.

    Ngem apay
    Nga iti tunggal kanito
    A masaripatpatak
    'Ta naslag a raniagmo,
    In-inut a mapukaw
    Ti rimat ti panagandapko
    Ket pilpilitek ti agallatiw
    Kadagiti narukbos a kayo
    A paglingedak bayat panangmatmatko
    Iti lawag nga agtaud kenka?
    

    Agnanayon kadi a dagiti arapaapko
    Ket arapaap laeng
    A sika  ket kakinnibinko a rumukuas
    Iti agdama a kasasaad
    Ket dagita rimatmo ti pagsammakedak
    A mangbayabay kaniak a mangtalaytay
    Kadagiti bangen a tumpuar
    Iti dalan a pagnaak.


LOWELA AVANZADO  ZAMORA LAUD

Ma On Shan, Hongkong

RITMO NI AYAT

Naatap man ti ridep
Ita a rabii kaniak
Ta dayta isemmo
Adda a mangkurkuriro.

Sam-it ni balikas nga impabalonmo
Tignayenna latta 'toy riknak, biagko
Dagita matam no malaglagipko
Kasla man kaniak manglalailo.

Wen,  diak madaeranen
Bara ken sam-it dagiti agekmo
Aprosmo a mangliwengliweng
Panunotko iti nakaisadsadak a disso.

Ket ita a rabii danggayannak
Iti ritmo ni ayat
A mangparmek lamiis ti agpatnag
Uray iti tagainep laeng.


ROWENA A. RUIZ
Hong Kong

ISEM

Immisem dagiti bituen
Idi mabigbigdaka
Nagimon dagiti didiosen
Idi kibinenka. 


Napno’t rag-o daytoy pusok
Idi perngennak
Uray la a nagbetteg 'toy rusok
Nagdir-i ti kaunggak.


Agnanayonka koma
Nga adda ditoy dennak
Ayna, dayta kallid-
Abut ti kusimay idiay aplaya.

Natinnag ti arapaap
Idi linidokmo  'ta serbesa!
Hoho! nalalaingka met nga uminom,
Ngem iti daytoy nanumo a karabukob!

Agburagsotak koma
Ngem makaalino dayta isemmo
Agpasidumriak koma
Ngem nabileg 'ta aprosmo. 


Itugotko ngarud iti lagip
Dagita a bibig
Lagipek dagidi garikgik
Apros, isem ken sam-it.



FERDINAND N. CORTEZ
Tuguegarao City, Cagayan

ITI IPAPANAWMO

biagko, no gustuem a mapukawakon dita dennam
dawatek nga ipariknam koma kaniak
iti kamaudianan ti bara 'ta ayatmo
tapno iti ipapanawmo ket adda batonlagipko.


ti ladingitek unay ket dimo man laeng
imparipirip nga adda gayam gandatmo
nga umadayo ditoy sidongko
kasanoak pay ita ket biagko 'ta ayatmo?

sika ti liwliwa ken ragsak 'toy pusok
sika ti aminko ket no pumanawka
sinno payen a barukong ti innak pagsadagan
sinno pay mangep-ep 'toy iliwko kenka?



nagsakit ketdin daytoy nga impalak-ammo
nagsanaang nga umukuok ditoy nakemko
diak ammo no kaanokto a malipatan
daytoy impaaymo a leddaang ken limdo.

kamaudiananna,  ikarik a sika laeng
ti agnaed ditoy pusok ken panunotko
no dumtengto man ti baro nga ayat
laglagipem- sika laeng linaun 'toy pusok.

aglabas man ti naruay a panawen
ket no malagipmonto pay ti agsubli kaniak
dika koma bumdeng, ta sika ket sikanto
pay laeng ti innak inay-ayat ken ipatpateg.


IMELDA BATARA ALIBUYOG
Koblenz, Germany

'TOY PUSOK A NAIKULBO

Nasapa a nakarikna 'toy pusok iti ayat
Kangrunaanna iti inaldaw, bullalayaw amin a makitak
Arigna magmagnaak kadagiti ulep a nagmaris rosas
Aglaplapunosan ragsakko, awan pulos makaartap

Ngem gayam, no adda rag-o, adda met limdo
Simmurot iti sabali 'tay kakaisuna nga ipatpategko
Nagpayanud sabali nga ayamuom, nalaplapsat, nalalailo
Nabatiak nga aglulua a nangbagkat nagmanto a lubongko

Naundayen a panawen ngem umagibas lattat' napalabas
Ta daytoy piglat iti pusok, saanen a nawaswas
Tunggal malagipko dagidi karina nga agkakaimnas
Umkis manen 'toy kaunggak, mangabaruanan a panaas!

Immammingaw met kampay idi, kabarbaro a karayo
Natataeng ngem siak, napipia, bareng makapudno
Diak impagarup a maanayan puris 'toy barukongko
Daksanggasatak latta, ta ni manong gayam ket pamiliado

Binukodak sasainnek, amin liday a sinagrapko
Nagbiddutak manen, annugotek met a basolko
Isu nga inkarikon manipud idi a tiempo
Diakton imdengan 'toy puso, uray agdeppa amin a santo

Adu dagiti manglimlimo a kabagian ni Adan
A  di mapnek iti maysa a sabong, yawiddat' intero a minuyongan
Sabidongdat' parmata, mangulawda a mamimpinsan
Pinagtalkam, ngem no agkiremka la iti  mabiit...gundawayandakan

Nasaysayaat laengen ti agbiag nga agmaymaysa
Tapno awanen rason a maikulbo, puso ken rikna
Diro ni ayat, linipatkon, nagbalinen a karkarna
Panagpitik manen 'toy pusok, panawen laeng ti makaibaga.

MARICHEL SUGUITAN

Sai Kung N.T.

Hongkong

AGTUTUBO

Agtutubo, agriingka
Riingem dayta matmaturog a dara
Agmurmuray ket bumangonka
Naputed a namnama ti pagilian ituloymo ida.

Iwarasmo dagita matam,
Luktam dagiti lapayagmo,
Imdengam dagiti araraw dagiti umili
Ta sika ti adigi ti pagilian.

Lipatem dagiti maiparit nga aramid
Agtakaw, agrames ken agusar droga dimo panunoten
Pagsayaatan ti pagilian,  aramidem
Salaknibam tattao a mairurumen.

Kas maysa nga agtutubo, saluadam
Dayaw pagiliantayo a nakayanakam
Sapay la koma ta dika mayaw-awan
Pasimbengem 'ta panunotmo a mangsurot
Nawaya a dalan.

AMY SALVADOR RAMOS

Hongkong

APAY A SANGITANNAK?

Apay ngamin a sangitannak,
ken dagiti luam manaknakanak?
Masobraam sa met ti agararapaap
nga iti dennam umadayoak..

No pimmanawak man
iti sidong ti immuna nga innak inay-ayat,
pammateg ken panangilalana
diakon ida narikna...

Ket iti baet dagiti limdo,
ken ladingit a sinagrapko,
dimtengka a simpakada, di matukod nga ayat inka imparikna..

Ita sangsangitannakon
gapu iti pagarup a makasabidong,
nabara nga agek, arakup a nairut,
kadagiti kararuata isuda ti mamagsiglot!


ESTER MASULI FILOMENA
Sanchez Mira, Cagayan

TI ULEP, TI TUDO KEN ALLAWIG

kasapulan kadi pay a lukotek amin
dagiti kimmapas nga ulep
ket isagutko kenka kas pammaneknek
sin-aw ken kinapudnok.

kasapulan kadi a tayaek kada tedted
ken surotek dagiti tarakitik
ti agtinnag a tudo a mangdam-eg
iti katapokan a dalan ken aglawlaw
nga agkasapulan iti bisibis.

kasano a sarangtek ti napigsa nga allawig
no kawitenna ti kinalap-itko,
awan pagibturko a sumaranget
no sul-oyenna 'toy  pigsak.

kasano pay a mapaneknekakto
no bilang siak ti mapukaw
dita imatangmo,  no siak ti kulpaen
dagitoy a karit ken pannubok
bigbigennakto kadi a siak dayta?

makunamto pay ngata a siak daydi nangilaban
nangidaton kenka iti kimmapas nga ulep
a siak nangsakdo iti bayakabak
ken nangpakalma iti agtirtiritir nga allawig.


ala, no masungbatamto dagita a saludsodko,

akasemto dagiti ulep
tayaemto dagiti tudo
sarangtemto ti allawig

ket no maaramidmo, ayatenkanto met iti agnanayon!


JOSIE VITALES
Burgos, Ilocos Sur

UR-URAYEK

Segseggaak ti  init iti itatangkayagna
Ngem apay a nanglangeb met ti masaripatpatak
Partaan kadi manen ti sabrak?

Apay nga iti tunggal panagragsak
Iti apagdarikmat  sibbaruten
Ti nadawel a gasat?
Rumbeng kadi a saanakon nga umisem
Saem ken liday kadi lattan ti mangak-aklulo kaniak.

Ngem saanko a pukawen ti namnamak
Umaddangak...
Nasaem a kapadasak
Lagipda, rumukuasak
Ket pasungadak ti idadateng ti baro a bannawag
A mangitunda kaniak
Iti desdes nga agturong natalinaay a panagbiag.

LOWELA AVANZADO  ZAMORA LAUD

Ma On Shan, Hongkong

SAANEN A SIKA

Inanayen daydi kalman
Inin-inutdan a kinkinnan, kinilkilabban dagiti naglabasan
Awanen a pulos ti nagmamaayan
Ti librito nga inna nakaisuratan.

Saanen a sikat' nakaibugas kadagiti aglabas a kanito
Saanen a sikat' tarigagayan daytoy puso
Saanen a sikat' ayatko
Ta addan agtagikua iti aminko.

Idi tunggal iwalinko ti kortina nga ulep
A nayabbong kadagiti bituen
Sikat' sapsapulek, baggak a natured.

Ngem nagbaliwen ti amin
A kas panagbaliw ti panawen
Intayaben ti naranggas nga angin
ti ayat a naileblebben.

Naimaro, nagpabaro
ti nakeltay a puso.


ROSALIE ALBANO BARNACHEA
Burgos, Isabela

ITEDMO 'TA TALEKMO

ammok nga agpangaduaka, ayatko
ta panawandaka nga agmaymaysa,
ngem ammom met a ti ipapanawmi, saan
a pananglipat wenno panangbaybay-a kenka
ikuykuyogmi iti papananmi ti pammategmo,
ti anusmo, ti dungngom, ti ayatmo.

saan la a siksikanto ti matarimbangon
ta uray dakami, alimbasagenkaminto
iti iliw ken bara ti kayepkepmo;
iti areng-eng ken sam-it ti agekmo.
ikarik a siksika laeng, ayatko
ti naglaon iti puso ken panunotko
siak,sika ken dagitoy annakmo
padapadatayo nga agsakripisio
itedmo ngarud kaniak ti talek
tapno iti papananmi, mariknak ti talged.

ammok nga alaento ti tawen
a saantayo nga agkikita
ngem kanayonkonto nga iyarasaas
kadagiti sabong ti panagayatko kenka
ket makaammon ti angin a mangsapul
ken mangidanon ti iliwko kenka.

kanayonkonto nga agkan dagiti agus
ta ammok agbalin dagitoy nga ulep
ulep nga agbalin nga arbis
arbis nga agdisso kadagita pingpingmo
sada agayus kadagita suli ti bibigmo
ammokton, ayatko, a dimmanon kenka
ti mail-iliwan nga agekko.

FERNANDO ALONZO
Wahiawa, Hawaii

RISIRIS

Nagdadagsen a sinniplag
sa kimmayabkabda a nagpangato
manipud ditoy barukong
ken mugingko.

Nagalipugpog a timmapok  iti sakaanak
naikuruayak a nailangdet iti daga
nairadrad dagiti bituen kadagiti agbalbaliktad a matak
iti panagpuligos ti lubongko.

Nagluaak iti dara
Nagsayasay iti buokko
nasalubongan dagiti lapayagko
ket nailimug ti langsi iti saan pay
a nagarinsaed  nga angin.

Iti tangatang, nariparko ti kinabisked
ni  Prometheus ket ti kinalukmo ni Eros, adda iti babaenna.

Iti bulsito dagiti ulep, kinaut ti immun-una
ti bola ti gurruod ket imbarsakna iti naud-udi.

Naggaradugod ti aglawlaw
simmiag  ti nagbukel nga apuy ti pungtot
nagbettak iti bagik
nagsuek ni Eros ket naibarsak iti kabatuan.

Nagkuripaspasak.

Rinakus ni Aphrodite ti anakna
naganug-og
dinanggayan iti dung-aw dagiti diosa iti law-ang.

Nariknaka.

Nagtulidtid ti kamuol iti karabukobko
ket diak makayebkas
naglabutab ti ngiwatko
nagayus ti agongko
naibuang ti taaw iti pangpang dagiti matak.

Ti daradara nga Eros kellaat a bimmangon
inukradna dagiti salungayngay a payakna
ket imsiag iti law-ang.
Idiay, nakitak ti panangasutna iti kimat iti likudanna
imbiatna ken Prometheus.

Limtuog ti langit
nauram dagiti ulep
dimmapo dagiti bituen
nagimpierno ti law-ang.

Kadagiti maipugpugso nga asuk
naanninawak ti panagrapet dagiti dua a didiosen
nariknak ti panagpinnirgisda
ti panangpirgisda iti lasagko
agingga a  nanabsuokda a nangtupak kaniak
maminribu a kas iti lubong ti kadagsenda.

Ket nagkuripaspasak.

Nariknaka manen.

Nagtulidtid ti kasla kamuol
a gurruod iti karabukobko
Kayatna manen ti kumayabkab a rummuar
kadagiti giteb ti ulok.

Aggilgilap ti kimat iti nalukneng
a kaunggak,
sisasagana.

Agkirkirayak.


CORAZON F. QUIAMAS
Laoag City

KINALATAK

Talekmo pay ta maysaka a naisangsangayan
Maysaka kadagiti tangtangaden ti kagimongan
Narimat a kasla bituen nga adda iti tangatang
Naidumduma 'ta lawagmo, nalatak iti kaaduan.

Ngem pagayam, ibalakadko kenka
Aluadam koma ti kaaddam iti tangatang
Ta amangan no mabiglaka a dimo mapupuotan
No sikan 'tay manabtuog gapu iti kinatingram.

Adda pagsasao  a diak pulos malipatan
A ti biag kasla ligay, sinnublat ti lugar a pagsaadan
No addaka ita iti ngato dumtengto ti panawen
Sikanto met ti sumublat iti baba ta ti pilid nagtuliden.

Ita ta addaka dita ngato sika ti mabigbigbig
Ngamin sika ti naisagutan iti  naisangsangayan a sirib
Ngem  dimo sigsiguraduen a saankan a  mairukib
Annadam a mapasaktan nakem dagiti umay aggidigid.

Kastay kunak sinnublat laeng ti kinabaknang
No sika ita ti tangtangaden iti ngato a pagnaedam
Dumtengto met ti panawen a sika ti agkarayam
No dika agnakem, dagiti napasaktam ket  isudanto ti pagtamdan.

Galadmo a kinapalangguad gapu ta sika ti naaddaan
Isu ti mangitunda kenka a matnag daga a pagnaedan
Kinapalangguad ken kinadamsak a gapuanam
Ikkatem koma tapno dikanto agbabawi iti kamaudianan.


IMELDA EMY TOLEDO

Calgary, Alberta

IGID TI BAYBAY

taltaluntonek ti napinas a kadaratan nga inagkan
ti dalluyon a mangallukoy iti panagsalada
kabayatan a maitaytayab ti nalailo a sonata
nga idaydayyeng ti angin nga aggapu iti amianan
a mangapros daytoy mamagmagaan a pingpingko
nga agur-uray dita agekmo nga il-iliwek unay.

matmatmatak dagiti tumatayab nga agsuek
nga umagep, agpisaw tapno agsellepda
dita nalamiis a  dalluyon a sumabat met a makilinnangay
makikinnamat kadagiti tumatayab a gumarakgak-
kasla addaanda iti ima nga agiginnaw-at, agiinniliw
sadanto agiinnallawat kadagiti petpetpetanda a  darikmat.


kasda la inyugis dayta kailiwko unay a rupam
dita tangatang nga inkayaw-at puraw a billit-
gaw-atek la koma ta tiliwek tapno damagek
saludsodek kenkuana no sadino ti ayanmo
tapno isuna ti kaduak nga umay mangsukon
ta yawiddaka ditoy pagtaenganta nga agur-uray.

nariknak ti  natnag nga arbis ditoy tuktok ti agongko
nanglangeb a dagus ti tangatang ken aglawlaw
a, diak napupuotan a nasipnget gayamen-
nakapakadan ti init a naglemmeng
kadagiti nagpanes nga ulep.
ay, sardamen ket sika ti umuna a kablaawak:
o ayatko,  naragsak a rabiim ket yegko manen
nadungngo ken nalamuyot nga agekko.
sapay koma ta agkitatan iti kabiitan a panawen.


JOSEPHINA V. HERREMA
Netherlands

SIIIMETAKTO LATTA

Siiimetakto latta kadagiti naglabas a kanito

A no kastoy a dumteng ti sardam

Sumirsirip ket sirsiripek met diay bulan

Iti rekkang ti diding.

Siiimetakto latta kadagiti kanito

A no tunggal tangadek dagiti bituen iti tangatang

Agkikinniddayda, agkikinnirem

Ket siraragsakda a mangpadpadaan iti isem.

Siiimetakto latta kadagiti naglabas a kanito

Kadagiti gilap ti kulalanti

A manayabtayab a mangbambantay

ken mangsilsilaw iti nasipnget nga aglawlaw.

Siiimetakto latta kadagiti naglabas a kanito

Iti apras ti salemsem ti angin

Nga umagep iti bagi.

Wen, silalagipakto latta agingga iti inggana.

ROSALIE  ALBANO  BARNACHEA

Burgos, Isabela

AMA, INA, ANAK

Ama,  sika ti adigi ti pamilia

Itedmo amin a kabaelam tapno annakmo agragsakda

Uray kasano a rigat agibturka

Tapno agbalinka a pagwadan dagiti lallaki a kas kenka.

Ngem gapu iti rigat ti biag,  napanunotmo ti immadayo

Pagilian dagiti arabo  ti naturongmo

Rigat ken tuok imbaklaymo amin ida

Ayatmo laeng nga ambision dagiti annakmo ket maitedmo.

Ket sika met ina ti pagtaengan

Adu a lulua ti nagarubos

Liday ken rigat ket sinagabam

Gapu iti kaawan ni asawam.

Kabayatan ti panaggiinnadayo

Dua a banag ti imbaklaymo

Maysa nga ina dagiti annakyo

Ken kas maysa nga ama nga adayo dita sibayyo.

Ket dakayo nga annakda

Ti panagadal ipasnekyo

Tapno ti arapaap ket magun-odyo

Kasta met 'tay ragsak a kalkalikagumanyo.

Dimteng ti aldaw nga inur-urayda

Nagbungan ti sakripisio da ama ken ina

Annak nakalpasdan iti panagadalda

Ket isuda metten ti namnama da ama ken ina.

AMY SALVADOR RAMOS

Hongkong

NO MANNANIWAK LA KOMA

Mabalin a mauyongak-

Sapsapulek ti bugas ti pudpudno a daniw

A naitalimeng iti lansad-barukong ti pluma

Dagiti bangolan a mannaniw a pagtamtamdak.

Agkupit ti barukong

Agalimbadaw ti panagkita

Tunggal kayatko koma met a tapayaen

Kadagiti dakulap ti bugas ti daniw

A kasla nakarimrimat a perlas.

No mabalin la koma, pespesek ti maudi a taredted ti lua

Bareng adda dita ti daniw a nabayag a kinupkupikopak iti kinaagmaymaysak

Kadagiti nagmanto a darikmat...

Ngem diakto bumdeng nga agarapaap

A maidennes ti ayamuom ti sabong iti barukong

A mangisab-it kadagiti maris ti bullalayaw iti imatang.

Ta no mannaniwak la koma a kas kadakuada-

Kabaelak met a tukoden ti kaadalman a tukot ti baybay

A danonen iti apagdarikmat

Ti di maungpot a kinalawa ti taaw

A pengdan dagiti aggiginnantil, agkikinnamat a dalluyon

A sukdalen dagiti agbibitin a bituen iti law-ang

Nga arakupen ti naslag a bulan iti sidong ti namayengmeng nalabaga a sardam

A pengdan ti panagaludaid ti aglabas a kalman.

Dagiti laeng kadi mannaniw nga agdudulpet nga agkatkatawa nga agmaymaysa

Nga awan bibiangna iti aglawlawna ti makatakuat iti pudpudno a kaipapanan ti daniw?

Ala, aw-awatek a mauyongak...

NEXON AGCAOILI

Pamplona, Cagayan

ADDANTO MANEN PANAGBUSEL

No maaddaanak koma iti gundaway 

A makikadua kadagiti kulibangbang 

Tapno mangegak ti pagsasaritaanda. 

Ania dagiti yar-arasaasda iti kasabsabongan? 

Inton mapugsat ti angesda 

Surotek man dagiti kararuada 

naragsakda met laeng ngata 

Uray adu a sabong ti napagsangitda? 

Ania ngata ti ipay-ud 

Dagiti payakda ta iti pannakawagwag ti sabong 

Bulonna metten a yukrad dagiti petalo a pagdissuanda? 

Ngem apagkanito laeng ti panaganninek 

Ket ti nalinnaawan nga ayamuom mabati 

Agingga a matnag a bukel iti daga. 

Apay ngata nga agpukaw 

Dagitoy a kulibangbang 

Kalpasan iti panagsasabong, 

Iti masanguanan ti panagruruting? 

Ibagak kenka, 

Addanto manen panagbusel 

Ket saan amin nga agtaytayab 

Iti hardin ket kamarmaris 

Dagiti makabulsek a bimmullalayaw a payakmo. 

SUERTE CRISTOBAL PULPULAAN

Kuwait City