AGUNNOYAK KENKA
isilpok koma
ti angesko
kadagita bibig
ta ti sang-awmo
kas iti kaad-adaw
nga angot dagiti bulong
sabong ken ruot manipud
iti nalinnaaw a parbangon
makabiag
nasam-it
makasalibukag…
ti panagati ken panagatab
ti taaw
isu ti ritmo ti angesko
nasudi
natalinaay
ket kas maysaa nabukel a daga
adda batombalanim
iti panangrikusmo kaniak
iti inaldaw
o bulanko.
ti panagunnoyko
saan a maiparangarang
babaen
kadagiti agar-ariyakyak
agkikinnamat
agsisinnippit
a pagaw iti taleb
wenno iti aringgawis
dagiti muyong
ket uray matnag, maitaltagda
iti karuotan saanda
a marikna
ti sakit, ti saem…
uray pay
kadagiti maikoreo
a surat ni ayat
wenno kadagiti maituktok
iti ridaw
a sangareppet
a naiplastik a sabong
saanda a mapagnaan
ti dalanko a pumungan kenka.
siak
iti yaasidegko
sangatukelak
nga innapuy a maikuruay
iti sanguanam
iti idadarudarmo
kadagitoy bimmubon
ngem rumimrimat a matak
ta awan ti mabalinko
nga idaton
no saan a ti siak…
CORAZON "RAZI" QUIAMAS
Ewa Beach, Hawaii
